ცოტა რამ ტიპიური მშვილდოსნის შესახებ

ამ ბლოგში საუბარია მხოლოდ და მხოლოდ ტიპიურ მშვილდებზე. მინიმუმ 5 პლანეტა უნდა იყოს ამ ზოდიაქოში, რომ ყველა დახასიათება დაემთხვეს. თუ მშვილდოსანი ხართ და თვლით, რომ ეს დახასიათებები თქვენზე არაა, ე.ი. სხვა ნიშნების გავლენა გაქვთ პირად რუკაში და საჭიროა რუკის შედგენა.ცნობისმოყვარე და მუდამ ახალგაზრდა მშვილდოსანი, ზოდიაქოს მე-9 ნიშანი.

ამ ზოდიაქოს დევიზია:"ვესწრაფი რაღაც ახლის გაგებას! დაპყრობას!".

ყველა კამპანიაში არის ერთი გამორჩეული პერსონაჟი, რომელიც ყველა საკითხის შესაწავლას ჰლამობს, ყველა საუბარში გეჩრება და ბევრს "ფილოსოფოსობს". ეს ტიპიური მშვილდოსნის დახასიათებაა, თუ თქვენ თავში ამ თვისებებს აღმოაჩენთ, ე.ი. ამ ნიშნის გავლენა გაქვთ პირად რუკაში. მშვილდოსნები საოცრად ცნობისმოყვარეები, ენერგიულები, თითქმის დაუღლელები არიან. ყველაზე საინტერესო ფაქტი ისაა, რომ მათ ეს ენერგიულობა სიკვდილის ბოლომდე გაჰყვებათ ხოლმე, ხნიერ მშვილდოსანს ნამდვილად დაღლას და ასაკს ვერ შეატყობთ, ის მუდამ ახალგაზრდაა. მას მშვენივრად გამოსდის კომუნიკაცია ახალგაზრდა თაობასთან, მუდამ გეკითხება ახალი ტექნოლოგიების შესახებ, მას სურს დაეწიოს ამ საუკუნეს. მშვილდოსნებს საოცრად უყვართ მოგზაურობა. თუ მას ამის საშუალება აქვს, აუცილებლად მოივლის მთელს მსოფლიოს თუ არა, 20 ქვეყანას მაინც და საოცრად შეერევა იქაურ ელიტას და გარემოს, მას ადაპტაციის საოცარი უნარი აქვს და მუდმივი ცნობისმოყვარეობა მას განვითარებაში ეხმარება. მას ბევრი საქმე ეხერხება, მრავალმხრივ ნიჭიერია, მაგრამ ერთი კონკრეტული სფერო არ აინტერესებს, მისი მსოფლმხედველობა ფილოსოფიასაც კი სწვდება. მშვილდოსანი ნამდვილი "მონადირეა" თავისი ბუნებით. ვერ ვიტყვით, რომ ეს ნიშანი იდეალური მეოჯახეა, თუ მას თხის რქის გავლენა არ აქვს, ეს ნამდვილად არაა ასე. ის არასტაბილურია, მუდამ სიახლეეები სწყურია, მოგზაურია ბუნებით და მას ერთგულებას და მუდამ სახლში ჯდომას ნუ მოსთხოვთ (განსაკუთრებით თუ ეს კაცია). მშვილდოსნებს აქვთ სხარტი გონება და ლომისგან და ვერძისგან განსხვავებით, მშვილდოსნისგან კარგი მეცნიერი და მასწავლებელი დადგებოდა. მშვილდოსანი მართავს მე-9 ასტროლოგიურ სახლს, რომელიც მსოფლმხედველობის, ფილოსოფიის სახლადაა მიჩნეული. მშვილდოსანთან ურთიერთობა თავდაპირველად გმუხტავს პოზიტიური ენერგიით, შემდგომ უკვე იღლები. რატომ? იმიტომ, რომ მშვილდოსნის გაჩუმება, პრაქტიკულად შეუძლებელია. მათ აუდიტორია სჭირდებათ, ისინი საუკეთესო ორატორები არიან, არასოდეს არ იღლებიან პოლემიკით. მშვილდოსანს აქვს საოცარი შარმი, რომელიც იზიდავს საპირისპირო სქესს, მათ თაყვანისმცემლები ნამდვილად არ აკლიათ, თუმცა აუცილებლად ჰკითხეთ, არიან ისინი სერიოზული ურთიერთობებისთვის მზად? ჰმმმ...20 ქვეყნის მოვლის შემდგომ გეტყვით პასუხს, თუ არ დაავიწყდა. სასიყვარული ურთიერთობები მათ მალე ბეზრდებათ, ისინი მუდმივ სიახლეს ელიან პარტნიორისგან. მშვილდოსნების პრობლემა იმაშია, რომ მათ თავადაც არ იციან, თუ რა ტიპაჟია მათთვის შესაფერისი. ისინი მუდამ შეყვარებულები არიან, მაგრამ არსებობს სიმპატია, რომელიც მთლად სიყვარული არაა. მათი გატაცებები საკმაოდ მალე იცვლება, როგორც ცხოვრებისეული, ასევე სასიყვარულო. კაცი მშვილდოსანი ნამდვილი მექალთანეა, რომელიც ჯერ შარმით დაგატყვევებს, შემდგომში უბრალოდ გაქრება და რომ ჰკითხოთ რაშია საქმე, ვერც აგიხსნით, უბრალოდ მიხვდა, რომ თურმე თქვენ ის ერთადერთი არ ხართ, რომელსაც ის ეძებდა.

მშვილდოსნები და კარიერა:
მშვილდოსანი, როგორც "ყველაფრის და არაფრის პროფესორი" მუდამ იდეალური პროფესიის ძიებაშია. მან ყველაფერი იცის არაფერზე და არაეფრი ყველაფერზე. ძალიან ხშირად მშვილდოსნები ირჩევენ იურიდიულ ან მასწავლებლის პროფესიას. რა თქმა უნდა კარიერის არჩევა ვენერაზეა დამოკიდებული და პირადი რუკით განისაზღვრება.

მშვილდოსნები და მოდა:
მშვილდოსნებს უყვართ სპორტული, თავისუფალი სტილი. თუ მშვილდოსან ქალს არ აქვს ვენერა თხის რქაში, მას არ უყვარს ფორმალური და კლასიკური სტილი. ტიპიურ მშვილდოსნებს, განსაკუთრებით ქალებს, ვენერით მშვილდოსანში უყვართ კაშკაშა, მყვირალა და ცეცხლოვანი ფერები, ამავდროულად სპორტული და კომფორტული.
რაც შეეხება მამაკაც მშვილდოსანს, მათ ქალი მშვილდისგან განსხვავებით უყვართ შარვალ-კოსტუმი და კლასიკური "სერიოზული მაჩოს" სტილი.

სტატიის ავტორია, ასტროლოგი: მარიამ შუკაკიძე